സംശയമെന്ത്, സലാഹ് തന്നെ; പ്രീമിയർ ലീഗ് ​െപ്ലയർ ഓഫ് ദ സീസൺ പുരസ്കാരം സ്വന്തമാക്കി

ലണ്ടൻ: പ്രീമിയർ ലീഗ് ​െപ്ലയർ ഓഫ് ദ സീസൺ പുരസ്കാരം ലിവർപൂളിന്റെ ഈജിപ്ഷ്യൻ സ്ട്രൈക്കർ മുഹമ്മദ് സലാഹിന്. പ്രീമിയർ ലീഗ് ജേതാക്കളായ ലിവർപൂളിനായി സീസണിൽ ഉടനീളം മിന്നും പ്രകടനങ്ങളാണ് സലാഹ് നടത്തിയിരുന്നത്.

28 ഗോളുകളും 18 അസിസ്റ്റു​കളുമാണ് ചെങ്കുപ്പായക്കാർക്കായി സലാഹിന്റെ സംഭാവന. സഹതാരങ്ങളായ വിർജിൽ വാൻഡൈക്, റ്യാൻ ഗ്രാവൻബെർച്ച്, ന്യൂകാസിലിന്റെ അലക്സാണ്ടർ ഇസാക്ക്, ആഴ്സനലിന്റെ ഡെക്ലാൻ റൈസ്, നോട്ടിങ്ഹാമിന്റെ ക്രിസ് വുഡ് എന്നിവരെ മറികടന്നാണ് സലാഹിന്റെ നേട്ടം.

2017-18ലും പ്രീമിയർലീഗിലെ മികച്ചതാരമായി സലാഹിനെ തെരഞ്ഞെടുത്തിരുന്നു. തിയറി ഹെൻ​ട്രി, ക്രിസ്റ്റ്യാനോ റൊണാൾഡോ, ​നെമാന്യ വിദിച്ച്, കെവിൻ ഡിബ്രൂയ്നെ എന്നിവരാണ് രണ്ട് തവണ ഈ പുരസ്കാരം നേടിയവർ. പോയവർഷം സിറ്റി താരം ഫിൽഫോഡനായിരുന്നു വിജയി. മികച്ച പ്രകടനത്തിന് പിന്നാലെ സലാഹുമായുള്ള കരാർ ലിവർപൂൾ പുതുക്കിയിരുന്നു.