മലപ്പുറം: സന്തോഷ് ട്രോഫിയിൽ സെമി ഫൈനൽ ലക്ഷ്യമിട്ട് കേരളം ഇന്നിറങ്ങും. മേഘാലയയാണ് കേരളത്തിന്റെ എതിരാളികൾ. രാത്രി എട്ടിന് മഞ്ചേരി പയ്യനാട് സ്റ്റേഡിയത്തിലാണ് മത്സരം.
തുടർച്ചയായ രണ്ട് വിജയങ്ങൾ.... ഓരോ കളിയിലും വ്യത്യസ്ത ഗോൾസ്കോറർമാർ.... ഗോൾ വഴങ്ങാത്ത പ്രതിരോധനിര. സെമി ലക്ഷ്യമിട്ട് മേഘാലയയെ നേരിടുന്ന കേരളം തികഞ്ഞ ആത്മവിശ്വാസത്തിലാണ്. കഴിഞ്ഞ മത്സരത്തിൽ പരീക്ഷിച്ച ഒറ്റ സ്ട്രൈക്കർ എന്ന തന്ത്രം പരിശീലകൻ ഉപേക്ഷിച്ചേക്കും. ഗോൾ സ്കോറർമാരായ നൗഫലും ജെസിനും ആദ്യ പകുതിയിൽ ഉണ്ടാകുമോയെന്ന് കണ്ടറിയണം. മധ്യനിരയിൽ നായകൻ ജിജോയും അർജുനും നടത്തുന്ന മികച്ച പ്രകടനം തുടർന്നാൽ കേരളത്തിന് അനായാസമായി കളി ജയിക്കാം. രാജസ്ഥാനെതിരായ മികച്ച വിജയവുമായാണ് മേഘാലയ എത്തുന്നത്. കുറിയ പാസുകളുമായി എതിരാളികൾക്ക് ഇടം നൽകാതെയുള്ള കളിയാണ് ലോലയുടേത്. ഫിഗോ സിൻഡായി എന്ന വിങ്ങറേയും കേരളം കരുതിയിരിക്കണം.