പതിനെട്ടാമത് ബ്രിക്സ് ഉച്ചകോടിക്ക് രാജ്യതലസ്ഥാനത്ത് ഇന്ന് സമാപനം; ഉഭയകക്ഷി ചർച്ചകളുമായി പ്രധാനമന്ത്രി

ന്യൂഡൽഹി: പതിനെട്ടാമത് ബ്രിക്സ് ഉച്ചകോടിക്ക് ഇന്ന് സമാപനം. കസാക്കിസ്ഥാൻ, ഫിലിപ്പീൻസ്, ഈജിപ്ത് രാഷ്ട്രത്തലവന്മാരുമായി പ്രധാനമന്ത്രി നരേന്ദ്ര മോദി സുപ്രധാന ഉഭയകക്ഷി ചർച്ചകൾ നടത്തും. അംഗരാജ്യങ്ങൾക്കിടയിലുള്ള സാമ്പത്തിക സഹകരണം, പ്രാദേശിക കറൻസികളിലുള്ള ഇടപാടുകൾ, സാങ്കേതിക കൈമാറ്റം എന്നിവ കൂടുതൽ ശക്തമാക്കുന്നതിനുള്ള സുപ്രധാന തീരുമാനങ്ങളോടെയാണ് ഉച്ചകോടി അവസാനിക്കുന്നത്.

വ്യാപാരം, നിക്ഷേപം, സാങ്കേതികവിദ്യ എന്നിവയിൽ പരസ്പരം പുതിയ ധാരണകളായാണ് പതിനെട്ടാമത് ബ്രിക്സ് ഉച്ചകോടി ഇന്ന് ഡൽഹിയിൽ സമീപിക്കുക. അംഗരാജ്യങ്ങൾ തമ്മിലുള്ള സാമ്പത്തിക സഹകരണം ശക്തിപ്പെടുത്തുന്നതിൽ ഊന്നിയാണ് ചർച്ചകൾ നടന്നത്. യുദ്ധവും തീരുവയും ഭീകരതയും ചർച്ചയായി. അതിർത്തി കടന്നുള്ള ഭീകരവാദത്തിനെതിരെയുള്ള കടുത്ത നിലപാടുകൾ മുതൽ ഡിജിറ്റൽ പബ്ലിക് ഇൻഫ്രാസ്ട്രക്ചർ, ആരോഗ്യം, സാമ്പത്തികം എന്നിവയിലെ പുതിയ സഹകരണ സംവിധാനങ്ങൾ വരെ ഇന്ത്യയ്ക്ക് നിർണായകമായ നിരവധി നേട്ടങ്ങൾ പ്രഖ്യാപനത്തിലുണ്ട്. വിഷയങ്ങളിൽ സമവായത്തിലെത്താൻ സാധിച്ചത് തന്നെ വലിയൊരു നയതന്ത്ര നേട്ടമാണ്.

ഏഴ് വർഷത്തെ നീണ്ട ഇടവേളയ്ക്ക് ശേഷം ആദ്യമായി ഇന്ത്യയിലെത്തിയ ഷി ചിൻപിങ്, അതിർത്തി തർക്കങ്ങൾ, വ്യാപാരം, ഉഭയകക്ഷി നിക്ഷേപങ്ങൾ എന്നിവയിലാണ് പ്രധാനമന്ത്രിയുമായി ചർച്ച നടത്തിയത്. തന്ത്രപരമായ കാഴ്ചപ്പാടോടെയാണ് ചൈന എപ്പോഴും ഇന്ത്യയുമായുള്ള ബന്ധത്തെ നോക്കിക്കാണുന്നത്. ഇരുരാജ്യങ്ങളുടെയും ആഭ്യന്തര സാഹചര്യങ്ങൾ വ്യത്യസ്തമാണെങ്കിലും, നമുക്ക് പരസ്പരം പിന്തുണയ്ക്കാനും ഒന്നിച്ചു വിജയം കൈവരിക്കാനും പൊതുവായ വികസനം സാധ്യമാക്കാനും കഴിയുമെന്നും ചൈനീസ് പ്രസിഡന്റ് പറഞ്ഞു.അതിർത്തിയിലെ സമാധാനവും ശാന്തതയും ഉഭയകക്ഷി ബന്ധത്തിന്റെ മുന്നോട്ടുപോക്കിന് അത്യന്താപേക്ഷിതമാണെന്ന് ഇന്ത്യ ആവർത്തിച്ചു വ്യക്തമാക്കി.

അതേസമയം, പാശ്ചാത്യരാജ്യങ്ങളുടെ മേൽക്കോയ്മക്ക് പരോക്ഷമായും ഇസ്രായേലിന് നേരിട്ടും ശക്തമായ താക്കീത് നൽകിയിരിക്കുകയാണ് ബ്രിക്സ് ഉച്ചകോടിയുടെ സംയുക്ത പ്രഖ്യാപനം. ഏകപക്ഷീയമായി തീരുവകളും ഉപരോധങ്ങളും അടിച്ചേൽപ്പിക്കുന്ന നിലപാടുകൾക്കെതിരെ കടുത്ത പ്രതിഷേധമാണ് ന്യൂഡൽഹി പ്രഖ്യാപനത്തിലൂടെ അംഗരാജ്യങ്ങൾ ഉയർത്തിയത്. ലെബനന്റെ പരമാധികാരം ലംഘിച്ച് തുടരുന്ന അധിനിവേശം അവസാനിപ്പിച്ച് സൈന്യത്തെ ഉടൻ പിൻവലിക്കാൻ ഇസ്രായേലിനോട് ബ്രിക്സ് നേരിട്ട് ആവശ്യപ്പെട്ടു. രക്ഷാസമിതിയിൽ ഇന്ത്യക്കും ബ്രസീലിനും സ്ഥിരാംഗത്വം നൽകണമെന്ന ആവശ്യത്തിന് ചൈനയും റഷ്യയും പിന്തുണ ആവർത്തിച്ചു.